У аўторак 25 чэрвеня айцец правінцыял Збігнеў Лячкоўскі SJ змяніў настаяцеля супольнасці езуітаў святога Андрэя Баболі ў Віцебску. Падчас святой Імшы ў кляштарнай капліцы айцец правінцыял падзякаваў цяперашняму настаяцелю Клеменсу Верту SJ і зачытаў дэкрэт аб прызначэнні новым настаяцелем Віктара Жука SJ. Ва ўрачыстасці таксама ўдзельнічаў Томаш Ортман SJ, настаяцель Расійскага рэгіёна Велікапольска-Мазавецкай правінцыі, да якога належыць віцебская супольнасць.
![3](https://www.jezuity.by/wp-content/uploads/2024/06/3.jpg)
За дзевяць гадоў служэння ў Віцебску айцец Клеменс здолеў, між іншым, пабудаваць касцёл у гонар святога Ігнацыя Лаёлы для новай парафіі святога Уладзіслава, апеку над якой біскуп Алег Буткевіч даручыў езуітам. Як паведамлялася раней, наступнай місіяй айца Клеменса стане Кыргызстан.
![2](https://www.jezuity.by/wp-content/uploads/2024/06/2.jpg)
Айцец Віктар Жук SJ, які з ліпеня 2019 г. служыць пробашчам парафіі св. Уладзіслава, нарадзіўся ў 1979 г. у Пінску, пасля заканчэння эканамічнага факультэта ўніверсітэта Марыі Кюры-Складоўскай у Любліне ўступіў у навіцыят Таварыства Езуса ў Новасібірску 14 жніўня 2003 г. Вывучаў філасофію ў Інстытуце філасофскіх даследаванняў “Alosianum” у Падуі, тэалогію — у Папскім Грыгарыянскім універсітэце ў Рыме, на пастырскай практыцы быў у езуіцкай сярэдняй школе ў Мілане. Ён спецыялізаваўся на біблійнай тэалогіі ва ўніверсітэце “Santa Clara” ў Каліфорніі. Дыяканскае пасвячэнне атрымаў з рук кардынала Джанфранка Равазі ў Рыме, а святарскае пасвячэнне з рук арцыбіскупа Тадэвуша Кандрусевіча 14 жніўня 2014 г. у Мінску. У 2015–2019 гг. працаваў у Маскве ў Інстытуце імя св. Тамаша. Два гады таму ён склаў манаскія абяцанні перад сваім правінцыялам айцом Збігневам Лечкоўскім SJ. Валодае беларускай, рускай, польскай, англійскай і італьянскай мовамі.
![1](https://www.jezuity.by/wp-content/uploads/2024/06/1.jpg)
Пасля святой Імшы адыходзячы настаяцель падрыхтаваў смачны абед для гасцей з Польшчы і Расіі. Затым езуіты наведалі біскупа Алега Буткевіча і прайшліся па гістарычным цэнтры горада.
![5](https://www.jezuity.by/wp-content/uploads/2024/06/5.jpg)